Baby Gokil Ajaib!

Judul: Baby Gokil

Penulis: Katenye Nitya dan Emaknye Yovita Rini Suswati
Nyang bersedia nerbitin: Gradien Meditama
Jumlah hlm: 208 hlm.
Tahun terbit: 2012
ISBN: 978-602-208-093-0

Alhamdulillah banget aye menangin ni buku gara-gara pertama kalinye ikutan kuis di KPBA. Kagak nyangka juga tulisan aye waktu ntu menangin perhatian juri. Wuidih pas aye di mention ma Bang Sinyo alias admin Komunitas Penulis Bacaan Anak tuh, ati aye deg-degan. Melototin notif sampe melotot-melotot. Begini bunyinye: PENGUMUMAN PEMENANG. Selamat kepada Mbak Ayati Fa dan Mbak Ade Delina Putri bla bla bla. Wah langsung aje aye jingkrak-jingkrak kayak kutu loncat, kagak mikir padahal di sebelah banyak keluarga aye yang lagi pada ngumpul. Haha ye maklum aja dah belom pernah menang kuis sih, kalo give away sih seriiiing *beuh plakkk.

Awalnye kagak terlintas kenape juga judulnya Bayi Gila, upzh alias Baby Gokil. Plus aye kira ni buku cuma novel fiksi biasa. Nyata eh nyata ni kisah nyata seorang emak dengan anaknye yang aye kira emang unyu-unyu plus gokil plus jenius banget. Pas mbaca blurb nye, belon baca isinye, aye udah dibikin ngakak-ngakak. Penasaran? Nah silakan dah baca sendiri bukunye haha

Pas dibuka, beuuh bagian Knock-knock alias kata pengantarnye ajaib banget. Lagi-lagi aye dibikin ngakak guling-guling. Namanye Nitya. Dialah yang bakal jadi pemeran utama dalam buku nni. Sekaligus yang jadi korban inspirasi emaknye.

Oke seperti yang aye bilang, si baby gokil itu ialah NITYA *tepuktangan*. Gilee masih pentil udeh pinter ngomong inglish inglish-an, wah aye yang udeh seperlima abad aje masih babibu kalo ngomong tu bahasa planet *eeh kagak kagak, waduh bisa didemonstrasi massa aye*. Bukan cuma ntu, tingkah Nitya yang kata emaknye emang ajaib banget plus sering bikin emaknye kalang kabut ngadepinnye. Belum lagi orang-orang sekitar Nitya yang juga jadi korban kejeniusan si Nitya. 

Aseli dah baca ni buku bikin stress aye ilang-surilang. Gaya bahasa emaknye yang nyantai dan sehari-hari banget bikin ni buku beda dari kebanyakan buku-buku non fiksi laennye. Suwer dah kalo lu pade baca buku nni kagak nyesel. Terutama buat para orang tua yang mungkin juga lagi stress ngadepin anaknye yang tingkahnye makin hari makin ajaib, baca buku nni bikin lupa sejenak sama masalah. Lah kok cuma sejenak, nyaiyalah tu masalah pan kudu tetep diselesein juga. Haha

Kelebihan yang aye suka, buku nni kagak dibates-batesin pake bab satu bab dua dst, tapi langsung judul. Jadi lebih gampang. Kekurangannye? Kalo yang baca kurang bijak ngadepin, bahasanye bisa-bisa dianggep kurang sopan. But for me *ceileh* aye sih kagak masalah tuh, malah lucunya jadi dapet banget!

Baiklah sekian dulu ye resensi aye. Kurang lebihnye aye mohon maap kalo ada bahasa nyang dirasa kurang sopan.

Pssstt..berhubung ini buku ‘gokil’, saya mencoba review dengan cara yang berbeda.
Sudah pernah diposting di sini